తక్కువ ఖర్చుతో సమర్థమైన సెమీకండక్టింగ్‌ పదార్థం అభివృద్ధికి ఒక కొత్త విధానాన్ని భారత్, ఆస్ట్రియా శాస్త్రవేత్తలు తెరపైకి తెచ్చారు.
→
ఎలక్ట్రిక్‌ వాహనాలు, హై వోల్టేజ్‌ ట్రాన్స్‌మిషన్‌ వంటి రంగాల్లో పవర్‌ ఎలక్ట్రానిక్స్‌ సమర్థతను ఇది గణనీయంగా పెంచుతుంది.
→
హిమాచల్‌ ప్రదేశ్‌లోని మండీ ఐఐటీ, ఆస్ట్రియాలోని వియన్నా విశ్వవిద్యాలయ పరిశోధకులు ఈ ఘనత సాధించారు.
→
అల్ట్రావైడ్‌ బ్యాండ్‌ గ్యాప్‌ సెమీ కండక్టర్‌ (యూడబ్ల్యూబీజీఎస్‌) అయిన గాలియం ఆక్సైడ్‌ను చౌకలో అభివృద్ధి చేశారు.
→
ఇందుకోసం ప్రత్యేక ‘లో ప్రెజర్‌ కెమికల్‌ వేపర్‌ డిపాజిషన్‌’ వ్యవస్థను వాడారు.
→
ఈ తరహా పదార్థాలు అధిక పనితీరు కనబరిచే సాధనాల సాకారానికి వీలు కల్పిస్తాయి.
→
పవర్‌ ఎలక్ట్రానిక్‌ వ్యవస్థకు పవర్‌ సెమీ కండక్టర్‌ సాధనాలే కీలకం. పునరుత్పాదక వనరులు, థర్మల్‌ విద్యుత్‌ ప్రవాహాన్ని ఇవే నియంత్రిస్తాయి.
→
వినియోగ అవసరాలకు తగ్గట్లు వోల్టేజీ, ఫ్రీక్వెన్సీని నిర్వహిస్తాయి.
→
సాధారణంగా పవర్‌ ఎలక్ట్రానిక్స్‌ గుండా పయనించేటప్పుడు విద్యుత్‌ నష్టాలు వాటిల్లుతాయి.
→
ఈ నేపథ్యంలో గాలియం నైట్రైడ్, సిలికాన్‌ కార్బైడ్‌ వంటి పదార్థాల సాయంతో పవర్‌ ఎలక్ట్రానిక్‌ వ్యవస్థ సమర్థతను పెంచేందుకు ప్రపంచవ్యాప్తంగా శాస్త్రవేత్తలు ప్రయత్నిస్తున్నారు.
→
అయితే ధర, ఇతర ప్రతిబంధకాలు ఎదురవుతున్నాయి. ఈ పదార్థాలను సన్నటి ఫలకాలను తయారుచేయడం ప్రధాన సవాల్‌గా మారింది.
→
విస్తృత అధ్యయనాల తర్వాత భారత్, ఆస్ట్రియా శాస్త్రవేత్తలు ఈ ఇబ్బందిని అధిగమించారు.
→
అత్యంత నాణ్యమైన యూడబ్ల్యూబీజీఎస్‌ సెమీ కండక్టర్లను అభివృద్ధి చేశారు.
→
దీనివల్ల హైపవర్‌ సాధనాలు 200 డిగ్రీల ఉష్ణోగ్రత వద్ద కూడా సమర్థంగా పనిచేయగలుగుతాయి.
→